काठमाडौं। ऊर्जा, जलस्रोत तथा सिँचाइ मन्त्री विराज भक्त श्रेष्ठले जोखिमपूर्ण हिमताल फुटाउन सरकारले आवश्यक तयारी गरिरहेको जानकारी दिए।
आइतबार सञ्चारकर्मीसँग कुरा गर्दै मन्त्री श्रेष्ठले विपद् जोखिम न्यूनीकरणका लागि ऊर्जा, जलस्रोत तथा सिँचाइ मन्त्रालयले अति उच्च जोखिममा रहेका हिमतालको जलस्तर घटाउन गृहकार्य गरिरहेको बताएका हुन्।
‘जोखिममा रहेका हिमतालहरु ब्लास्टिङ गरेर जलसतह पास गर्नेगरी छलफल अघि बढेको छ । जोखिमपूर्ण हिमतालको पानी वैज्ञानिक हिसाबले पास गरेर जोखिममुक्त गर्नैपर्छ । विपद् जोखिमको पूर्वतयारीमा हामी गम्भीर छौं । तयारी सकिएपछि निर्णय लिनेछौं,’ उनले उल्लेख गरे।
विशेषगरी जलवायु परिवर्तनको तीव्र असरका कारण नेपालका हिमाली क्षेत्रमा हिमताल विस्फोटनको जोखिम उच्च बन्दै गएको छ।
गृह मन्त्रालय र राष्ट्रिय विपद् जोखिम न्यूनीकरण तथा व्यवस्थापन प्राधिकरणका अध्ययन अनुसार मनाङको थुलगी, दोलखाको रोल्पा, सोलुखुम्बुको इम्जा र चो-रोल्पासहित कम्तीमा २१ वटा हिमताललाई ‘अति उच्च जोखिमयुक्त’ श्रेणीमा राखिएको छ।
यसअघि पनि नेपाली सेनाको प्राविधिक टोलीले इम्जा र रोल्पा हिमतालको पानीको सतह नियन्त्रित रूपमा घटाएर आसपासका तटीय क्षेत्र र जलविद्युत् आयोजनाहरूलाई सम्भावित विनाशबाट जोगाएको थियो। सोही सफल अभ्यासका आधारमा मन्त्रालयले अन्य जोखिमपूर्ण हिमतालमा पनि जलसतह घटाउने कार्ययोजना अघि बढाएको हो।
