काठमाडौं। संघीय संसद्का दुवै सदनको अधिवेशन यही वैशाख २८ गते सोमबारदेखि सुरु हुने भएको छ। मन्त्रिपरिषद्को सिफारिसमा राष्ट्रपति रामचन्द्र पौडेलले आगामी सोमबार दिउँसो २ बजे सिंहदरबारमा बस्ने गरी प्रतिनिधिसभा र राष्ट्रियसभा दुवै सदनको बैठक आह्वान गरिसकेका छन्।
संघीय संसद्को नयाँ भवन निर्माणको काम अझै पूर्ण रूपमा सम्पन्न नभइसकेकाले यस पटक पनि प्रतिनिधिसभाको बैठक निर्माणाधीन भवनकै बहुउद्देश्यीय कक्षमा सञ्चालन गरिनेछ भने राष्ट्रियसभाको बैठक संसद् सचिवालयस्थित साविककै कक्षमा हुने तय भएको छ।
संसद् सचिवालयका प्रवक्ता एकराम गिरीका अनुसार नयाँ संसद् भवन निर्माणमा संलग्न ठेकेदार कम्पनीले आगामी जेठ १५ गते संघीय संसद्को संयुक्त बैठकमा बजेट प्रस्तुत गर्ने समयसम्म प्रतिनिधिसभाको मुख्य कक्ष तयार गरी उपलब्ध गराउने मौखिक जानकारी दिएको छ।
संसद् सचिवालयले पनि यस पटकको बजेट नयाँ र व्यवस्थित कक्षबाट प्रस्तुत गर्न पाइने अपेक्षा राखेको छ। हाल निर्माणाधीन प्रतिनिधिसभा कक्षमा रङरोगन, आन्तरिक सजावट तथा अत्याधुनिक उपकरण जडानलगायतका प्राविधिक कार्यहरू धमाधम भइरहेका छन्।
संसद्को यो अधिवेशन मुख्य गरी सरकारको नीति तथा कार्यक्रम र बजेटमा केन्द्रित हुनेछ। अधिवेशनका क्रममा प्रि-बजेट छलफल, सरकारको नीति तथा कार्यक्रम, विनियोजन विधेयक, आर्थिक विधेयक र राष्ट्रको ऋण उठाउने विधेयकमाथि विस्तृत छलफल हुने कार्यसूची रहेको छ।
यसका साथै पछिल्लो समय जारी भएका अध्यादेशहरूलाई प्रतिस्थापन गर्ने विधेयकहरू पनि सदनमा पेश गरिनेछन्। संवैधानिक प्रावधान अनुसार संसद्को पहिलो बैठकमा पेश गरिएका अध्यादेशहरू बैठक बसेको ६० दिनभित्र टुंगाे लागिसक्नुपर्छ, अन्यथा ती स्वतः निष्क्रिय हुनेछन्।
हाल प्रतिनिधिसभामा राष्ट्रिय सभाबाट सन्देशसहित प्राप्त भएका तीनवटा विधेयकहरू विचाराधीन रहेका छन्। त्यसैगरी वैकल्पिक विकास वित्त व्यवस्थापनसम्बन्धी विधेयक २०८३ र अभौतिक सांस्कृतिक सम्पदा संरक्षण विधेयक २०८१ पनि संसद्मा दर्ता भएका छन्।
यी विधेयकहरूसँगै विभिन्न संवैधानिक निकायका वार्षिक प्रतिवेदनहरू र नियमावली मस्यौदा समितिको प्रतिवेदन पनि यसै अधिवेशनमा छलफलका लागि थाँती रहेका छन्।
