काठमाडौं । कोभिड–१९ महामारी फैलिएको ५ वर्षपछि चीनमा फेरि एकपटक नयाँ भाइरसको संक्रमण फैलिएको छ । यसका लक्षणहरु पनि कोरोना भाइरस जस्तै छन् । यो नयाँ भाइरसको नाम ह्युमन मेटाप्न्युमोभाइरस (एचएमपीभी) हो, जुन आरएनए भाइरस हो।
भाइरसबाट संक्रमित हुँदा बिरामीहरूले रूघा र कोभिड-१९ जस्ता लक्षणहरू देखाउँछन्। यसको सबैभन्दा बढी असर साना बालबालिकामा परेको छ । जसमध्ये २ वर्ष मुनिका बालबालिका बढी प्रभावित छन् ।
चाइनाको सेन्टर फर डिजिज कन्ट्रोल एण्ड प्रिभेन्सन (सीडीसी) का अनुसार यसका लक्षणहरुमा खोकी, ज्वरो, नाक बन्द हुनु र घाँटीमा घरघराहट हुनु जस्ता छन् ।
एचएमपीभी बाहेक, इन्फ्लुएन्जा ए, माइकोप्लाज्मा निमोनिया र कोभिड-१९ को केसहरू पनि रिपोर्ट गरिएको छ। यसका बिरामीको संख्या निरन्तर बढ्दै गएको छ ।
सामाजिक सञ्जालमा एक पोस्टमा बिरामीको तस्बिर राखिएको छ र चीनले भाइरस फैलिएपछि धेरै ठाउँमा संकटकाल घोषणा गरेको दाबी गरिएको छ। दावीका अनुसार अस्पताल र श्मशान स्थलमा भीड बढ्दै गएको छ ।
तर, चीनले भने त्यस्तो कुनै जानकारी दिएको छैन । द स्टारको रिपोर्टका अनुसार सीडीसीले अस्थमा र क्रोनिक अब्सट्रक्टिभ पल्मोनरी जस्ता रोगबाट पीडित बिरामीहरूमा संक्रमणको जोखिम बढी हुने बताएको छ।
खोक्दा र हाछ्युँ गर्दा भाइरस सर्ने जोखिम उच्च हुन्छ । यदि भाइरसको प्रभाव गम्भीर छ भने, यसले ब्रोंकाइटिस र निमोनिया पनि निम्त्याउन सक्छ। रोयटर्सका अनुसार चीनले यसको सामना गर्न निगरानी प्रणालीको पनि परीक्षण गरिरहेको छ।
एचएमपीभी भाइरस पहिलो पटक २००१ मा पहिचान गरिएको थियो । डच अनुसन्धानकर्ताले श्वासप्रश्वास रोगबाट पीडित बालबालिकाको नमूनामा यो भाइरस पत्ता लगाएका थिए । तर, यो भाइरस विगत ६ दशकदेखि वातावरणमा अस्तित्वमा रहेको छ ।
यो भाइरस सबै प्रकारका मौसममा र वातावरणमा पाइन्छ तर जाडोमा यसको संक्रमणको जोखिम बढी हुन्छ ।
चीनको वुहान सहरमा सन् २०१९ मा कोभिड–१९ को पहिलो केस फेला परेको थियो । त्यतिबेला यो रहस्यमय निमोनिया हो भन्ने सोचिएको थियो । यो सार्स-सीओभी-१ भाइरस (कोरोना भाइरस) बाट फैलिएको थियो।
त्यसपछि यो भाइरस विश्वमा तीव्र गतिमा फैलियो । जनवरी ३०, २०२० मा विश्व स्वास्थ्य संगठनले यसलाई विश्वव्यापी महामारी घोषणा गर्यो।
विश्वभर कोविडका ७० करोडभन्दा बढी केसहरू रेकर्ड भएका छन्। यसबाहेक ७० लाखभन्दा बढीको मृत्यु पनि भएको छ ।
