फुलगेन मगही-
ढल्केवर, बैशाख ३१ गते ।
धनुषाको मिथिला नगरपालिकामा मेयर महेन्द्र महतो र उपमेयर सुनिता सिंह बुढाथोकीबीच फेरि विवाद विवाद भएको छ । उपमेयर बुढाथोकीको योजना मेयर महतोले संचालनमा रोक लगाएपछि विवाद सुरु भएको हो ।
मेयर महतोको कार्यप्रति असन्तुष्टि जनाउँदै उपमेयर बुढाथोकीले प्रमुख प्रशासकीय अधिकृतको कार्यकक्ष र योजना शाखमा तालाबन्दी गरेकी छन् । आफ्नो योजना चलाउन रोक लगाएकोले मंगलबार प्रशासकीय अधिकृत र योजना शाखामा तलाबन्दी गरेको उपमेयर बुढाथोकीले बताइन् ।
‘मेरो भागको योजनाहरु संचालनमा रोक लगाइएको छ । मैले पटक पटक प्रशासकीय अधिकृत र मेयर महतोलाई मौखिक रुपमा गुनासो र तकेता गरे । किन मेरो शीर्षकको काममा रोक लगाउनु भएको छ ? तर उहाँहरुले जवाफ दिनबाट पन्छिनु भयो’ उपमेयर बुढाथोकीले भनिन् ‘त्यसपछि बाध्य भएर तालाबन्दी गरेकी हुँ’
मेयर महतो विधि प्रकृयालाई मिचेर मनोमानी गर्न खोजेको उनको आरोप छ । उनले लामोसमयदेखि कार्यपालिका बैठक समेत बस्न नसकेको बताइन् ।
यता मेयर महतोले नगरसभाविरुद्ध उपमेयर फेरि अदालतमा मुद्दा गरेको कारण बजेट संचालनमा रोक लगाएको प्रतिक्रिया दिए । उनका अनुसार दुईवर्षअघि उपमेयर बुढाथोकीले नगरसभाविरुद्ध जिल्ला अदालतमा गरेको मुद्दामा पालिकाको पक्षमा आदेश आएको थियो । तर फेरि सोही मुद्दा उच्च अदालतमा उपमेयरले पुनरावेदन गरेको कारण बजेट संचालन गर्नबाट रोक लगाएको मेयर महतोको भनाइ छ ।
‘मुद्दा फिर्ता लिने बिषयमा उपमेयरसँग मौखिक सहमति भएको छ । तर उहाँ मुद्दा फिर्ता लिन आलटाल गरेपछि बजेट संचालनमा रोक लगाउन बाध्य भएको हुँ’ मेयर महतोले भने ।
मिथिला नगरपालिकामा मेयर काँग्रेस र उपमेयर एमालेबाट जितेका छन् ।
