काठमाडौं । अमेरिकी विदेश मन्त्रालयले बुधबार घोषणा गरेअनुसार ट्रम्प प्रशासनले नेपालसहित ७५ देशका लागि आप्रवासी भिसा प्रक्रिया स्थगित गरेको छ । विदेश मन्त्रालयले दाबी गरेको छ ‘सूचीमा रहेका देशका आप्रवासीहरू अमेरिकी जनताबाट अस्वीकार्य दरमा सामाजिक सुविधा लिन्छन्।’
यो कदम ट्रम्प प्रशासनको आप्रवासनमाथि भएको कडाइको अर्को चरण हो जसमा निर्वासन र भिसा आवेदन रोक्ने कार्यहरू पनि समावेश छन्।
विदेश मन्त्रालयका प्रमुख उपप्रवक्ता टोमी पिगटले विज्ञप्तिमा भने, ‘जबसम्म विदेश मन्त्रालयले आप्रवासन प्रक्रिया पुनः मूल्याङ्कन गरेर सार्वजनिक सुविधा लिने विदेशी नागरिकहरूको प्रवेश रोक्ने सुनिश्चितता गर्दैन तबसम।मयी देशका लागि भिसा प्रक्रिया रोकिँदैछ ।
पिगटले थपे, “ट्रम्प प्रशासनले अमेरिकी जनताबाट सम्पत्ति असुल्नेहरूद्वारा भइरहेको आप्रवासन प्रणालीको दुरुपयोग अन्त्य गर्दैछ। विदेश मन्त्रालयले लामो समयदेखि रहेको अधिकार प्रयोग गरेर सार्वजनिक बोझ बन्न सक्ने सम्भावित आप्रवासीलाई अयोग्य ठहर गर्नेछ।”
अधिकांश भिसा धारकहरूले सार्वजनिक सुविधामा सीमित पहुँच पाउँछन्। उदाहरणका लागि अधिकांश ‘ग्रीन कार्ड’ धारकहरूले खाद्यान्न कुपन, आपतकालीन बाहेकको मेडिकल सुविधा र बाल स्वास्थ्य बीमा कार्यक्रम पाउन पाँच वर्षको प्रतीक्षा अवधि पूरा गर्नुपर्छ।
यो स्थगन विशेष रूपमा अमेरिकामा बस्न चाहने आप्रवासी भिसामा लागू हुनेछ तर अस्थायी कामदार, विद्यार्थी वा पर्यटकका लागि जारी हुने छोटो अवधिका भिसामा लागू हुने छैन। विश्वकपसँग सम्बन्धित भिसा पनि यसबाट प्रभावित हुने छैन।
विदेश मन्त्रालयले सामाजिक सञ्जाल ‘एक्स’ मा बताएअनुसार यो स्थगन जनवरी २१ देखि लागू हुनेछ र “नयाँ आप्रवासीहरूले अमेरिकी जनताबाट सम्पत्ति असुल्ने छैनन् भन्ने सुनिश्चित नभएसम्म सक्रिय रहनेछ।”
यो योजना पहिलोपटक ‘फक्स न्युज’ले विदेश मन्त्रालयको आन्तरिक मेमो उद्धृत गर्दै सार्वजनिक गरेको हो।
एक अमेरिकी अधिकारीले पुष्टि गरेअनुसार सूचीमा अफगानिस्तान, अल्बानिया, अल्जेरिया, आर्मेनिया, अजरबैजान, बंगलादेश, भुटान, ब्राजिल, बर्मा, क्याम्बोडिया, क्यामरून, कोलम्बिया, क्युबा, डेमोक्रेटिक रिपब्लिक अफ कङ्गो, इजिप्ट, इरान, इराक, जमैका, जोर्डन, काजाकिस्तान, कोसोभो, कुवेत, किर्गिस्तान, लेबनान, लिबिया, मंगोलिया, मोरक्को, नेपाल, नाइजेरिया, पाकिस्तान, रसिया, सोमालिया, दक्षिण सुडान, सुडान, सिरिया, थाइल्यान्ड, ट्युनिसिया, युगान्डा, उजबेकिस्तान, यमन लगायतका देशहरू समावेश छन्।
यसअघि पनि ट्रम्प प्रशासनले यीमध्ये धेरै देशका नागरिकहरूको आप्रवासन सीमित गर्ने कदम चालेको थियो। डिसेम्बरमा प्रशासनले १९ देशका नागरिकहरूको आप्रवासन आवेदन रोकिएको घोषणा गरेको थियो। मंगलबार प्रशासनले अमेरिकामा रहेका सोमाली नागरिकहरूको अस्थायी संरक्षित दर्जा (टीपीएस) पनि खारेज गर्ने घोषणा गरेको थियो।
