जनकपुरधाम/नेपाल राष्ट्र बैंकको जनकपुर कार्यालयका अनुसार मधेश प्रदेशमा सहुलियतपूर्ण कर्जा लिनेको संख्यामा वृद्धि भएको छ । राष्ट्र बैंकले मधेश प्रदेशको प्रादेशिक आर्थिक गतिविधि अध्ययनको वार्षिक प्रतिवेदनले गत आर्थिक वर्ष २०७८–७९ मा सहुलियतपूर्ण कर्जा लिनेको संख्या बढेसँगै बैंक तथा वित्तीय संस्थाले उक्त प्रदेशमा २२ अर्ब ३० करोड रुपैयाँ सहुलियतपूर्ण कर्जा प्रवाह गरेका हुन्। जुन गत वर्षको सोही अवधिमा यस्तो कर्जा १४ अर्ब ५ करोड रुपैयाँ रहेको थियो। एक वर्षको अवधिमा ८ अर्बभन्दा बढीले सहुलियतपूर्ण कर्जा बढेको हो।
‘समीक्षा वर्षमा सहुलियतपूर्ण कर्जा प्रवाहमा ठूलो वृद्धि आउनुमा नेपाल राष्ट्र बैंकको निर्देशनबमोजिम बैंक तथा वित्तीय संस्थाले सो कर्जा प्रवाह गर्दा धितोमा आधारित भई अन्य कर्जा सरह सहुलियतपूर्ण कर्जा प्रवाह गर्नु प्रमुख कारण देखिन्छ’, प्रतिवेदनमा उल्लेख छ।
राष्ट्र बैंकको तथ्यांकमा प्रवाहित कुल कर्जामध्ये सबैभन्दा बढी ४ अर्ब ४८ करोड रुपैयाँ अर्थात २०.१३ प्रतिशत सर्लाही जिल्लामा र सबैभन्दा कम १ अर्ब ८ करोड रुपैयाँ अर्थात ४.८७ प्रतिशत सप्तरी जिल्लामा रहेको छ। त्यसैगरी बैंक तथा वित्तीय संस्थाहरुले पर्सामा २ अर्ब ८२ करोड रुपैयाँ, बारामा ३ अर्ब ३० करोड रुपैयाँ, रौतहटमा १ अर्ब ८७ करोड रुपैयाँ, महोत्तरीमा १ अर्ब ८५ करोड रुपैयाँ, धनुषमा ३ अर्ब ५१ करोड रुपैयाँ र सिरहामा ३ अर्ब ३५ करोड रुपैयाँ सहुलियतपूर्ण कर्जा प्रवाह गरेको राष्ट्र बैंकको तथ्यांङले देखाएको छ।
यस्तै राष्ट्र बैंकले गत आर्थिक वर्ष २०७८–७९ मा बैंक तथा वित्तीय संस्थाहरुले मधेश प्रदेशको कृषि क्षेत्रमा ५३ अर्ब ९५ करोड रुपैयाँ कर्जा प्रवाह गरेका छन्। यस प्रदेशमा प्रवाह भएको कुल कर्जामध्ये कृषि क्षेत्रमा प्रवाहित कर्जाको अंश १२.५५ प्रतिशत रहेका्े छ ।
