काठमाडौं । काठमाडौं महानगरपालिकाका प्रहरीसंगको कुटपिट पछि घाईते भएका कवाड व्यवसायी संघर्ष समितिका अगुवा नेता योगेन्द्र प्रसाद साह काठमाडौंमा उपचार गराईरहेका छन् ।
उपचाररत साहलाई कवाड व्यवसायी संघर्ष समितिले ५० हजार आर्थिक सहयोग गरेको छ । समितिका संयोजक रामकेवल साह समेतको टोलीले साहलाई अस्पतालमै पुगेर उपचारमा सहयोग पुगोस भन्ने उदेश्यले आर्थिक सहयोग गरेका हुन् ।
आम जनता पार्टी (आजपा)का उपमहासचिव एवं प्रवक्ता चन्द्रभुषण साहले काठमाडौं महानगर प्रहरीको बढ्दो बर्दी आतंक तथा सनकको भरमा भैरहेको आपत्तिजनक स्वेच्छारी शासन एवं गुण्डागर्दीप्रति खेद प्रकट गर्दै उनीहरुलाई कानून बमोजिम कारवाहीको माग गरेका छन् ।
महानगर प्रहरीको कुटपिट एवं दमनमा परी अस्वस्थ भएका कबाड संघर्ष समितिका अगुवा नेता साहको शिघ्र स्वास्थ्य लाभको कामना गर्दै उनले आम जनताको जीउ धनमाथि धावा बोल्ने र कानूनको उलंघन गर्ने बर्दीधारीहरुलाई पनि कानून बमोजिम कारबाही गर्नुपर्ने माग सरकारसंग गरेका हुन् ।
प्रवक्ता साहले भने, कबाड व्यवसायीहरूको रोजी रोटी खोस्ने अधिकार कसैलाई छैन । सबै पेशाव्यवसायीहरुलाई गरीखाने वातावरण सरकारले निर्माण गर्नुपर्छ । किनभने, हाम्रो सम्पति र जीवनको सुरक्षाको प्रमुख दायित्व राज्यको हो । त्यसैले, हामी कुनैपनि बहानामा निषेध हैन निकास चाहन्छौं ।
पछिलो समय सर्वोच्च अदालतको आदेश विपरित र कानून विपरित काठमाडौं महानगरपालिकाले कवाड व्यवसायीलाई दुख दिदै उनीहरुको व्यवसायीक ठाउँ भत्काउने, कुटपिट गर्ने कार्यको कवाड व्यवसायीले प्रतिवाद गर्दै आएका छन् ।
कवाड व्यवसायीहरुले महानगरको प्रहरीलाई ठाउँ ठाउँमा प्रतिवाद गर्दै आएका छन् । उनीहरुले काठमाडौंमै मेयर बालेन साहको विरोधमा नाराजुलुशका साथै महानगर समेत घेराउ गर्दै आएका छन् । उनीहरु पछिल्लो समय आन्दोलनलाई थप कडा बनाउँने रणनीतिमा रहेका छन् ।
